– რა იგრძენი, როდესაც ნაციონალურ ფინალში გაიმარჯვე და ევროვიზიის კონკურსზე საკუთარი ქვეყანა უნდა წარგედგინა?

–ეს არის დიდი პასუხისმგებლობა. ვფიქრობ, შევძლებ ჩემი ქვეყანა ღირსეულად წარვადგინო.მთელი შემოქმედებითი ჯგუფი ბევრს ვმუშაობთ,რომ მინსკში გამარჯვება მოვიპოვოთ. მოხარული ვარ, რომ მომეცა შესაძლებლობა და ვმონაწილეობ საბავშვო ევროვიზიის გრანდიოზულ კონკურსში.

–რას გვეტყვი საკონკურსო სიმღერის შესახებ?

–საკონკურსო სიმღერის ,,მარი–დარი” ტექსტი რამდენიმე ქართული სიტყვისგან შედგება. დარი – ქართულად მზიან ამინდს ნიშნავს, მარი – მე მქვია, ასე რომ მიყვარს მზე,მხიარულება. ბედნიერი და ენერგიით სავსე ვარ მეც და ჩემი სიმღერაც ასეთია. ფრაზები რამ–დამ–დური ქართული ფოლკლორიდან არის აღებული.

–ადრეც ხომ არ გიცდია ევროვიზიის კონკურსში მონაწილეობა?

–2008 წელს ვმონაწილეობდი შიდაშესარჩევ კონკურსში, მაგრამ მაშინ ,,ბზიკებმა” გაიმარჯვეს და საბავშვო ევროვიზიაზე ღირსეულადაც წარადგინეს საქართველო. ისინი ჩემი უახლოესი მეგობრები არიან და მათ ვგულშემატკივრობდი კიდეც. 2010 წლის შიდაშესარჩევ კონკურსში გამიმართლა. გულახდილად გეტყვით, ევროვიზია ჩემი ოცნება იყო, რომელიც ამისრულდა კიდეც.

– წლევანდელი კონკურსანტების სიმღერებისთვის თუ მოგისმენია, ფავორიტები თუ გყავს?

–რა თქმა უნდა, ყველა კონკურსანტის სიმღერებს ვუსმენ და ძალიანაც მომწონს, ყველა მათგანი თავისებურად კარგია.

–სხვა კონკურსებსა და ფესტივალებში თუ მონაწილეობდი?

–ვმონაწილეობდი რამდენიმე კონკურსში როგორც საქართველოში, ისე საზღვარგარეთ. ვიყავი ფავორიტი ტელეკომპანია ,,რუსთავი2–ს” პროექტში ,,ნიჭიერი” და მაყურებელთა დიდი სიყვარული , მხარდაჭერა მოვიპოვე. წილად მხვდა ბედნიერება საქართველოს დამოუკიდებლობის დღეს ჰიმნი შემესრულებინა,ეს დღე ერთ–ერთი დასამახსოვრებელი იყო ჩემს ცხოვრებაში.

–გასული წლების ევროფესტივალის მონაწილეებს შორის თუ გყავს ფავორიტები?

–კი,2008 წლის გამარჯვებული ჯგუფი ,,ბზიკები” და ასევე გამოვარჩევდი ლიტვის წარმომადგენელს, სიმღერით ,,Laiminga Diena.”

–2010 წლის ევროვიზიის კონკურსს თუ ადევნებდი თვალს, რომელიც ოსლოში ჩატარდა?

–ცხადია, ვგულშემატკივრობდი საქართველოს წარმომადგენელს სოფო ნიჟარაძეს. ასევე, გამოვარჩევდი უკრაინას და ჰოლანდიას.

–რა სტილის მუსიკას უსმენ, რომელი მომღერლები მოგწონს?

–უიტნი ჰიუსტონის სიმღერებს ვუსმენ და ვმღერი კიდეც, მომწონს ბიონსე, ქრისტინა აგილერა და ლედი გაგა.

–ალბომის გამოშვებას არ გეგმავ?

–საბავშვო ევროვიზიის კონკურსისთვის მზადებამ მაიძულა ეს ცოტა ხნით გადამედო.

–გმადლობთ მარიამ,2010 წლის საბავშვო ევროფესტივალზე წარმატებას გისურვებთ.

– გმადლობთ საინტერესო კითხვებისთვის.